Madaxweynaha Masar oo ku dhawaaqay todobaad baroor diiq ah
-
- Posted On 16-02-2015, 04:42AM
February 16, 2015 (GO)- Madaxweynaha dalka Masar Cabdulfataax Al-sisi ayaa ku dhawaaqay todobaad baroordiiq ah kadib markii internetka lagu baahiyey video muujinaya dilka 21 qof oo u dhashay Masar kuwaasoo lagu laayey dalka Libya.
Dadka la diley oo ka shaqeynayey gudaha Libya dhammaantoodna ahaa Qibdiyiin haysta diinta kiristanka, waxaa labo bilood kahor magaalada Sirte ka qafaalatey koox xagjir ah oo gacansaar dhow laleh ururka IS.
Muuqaalka internetka lagu baahiyey ayaa muujinaya la-haysteyaasha oo loo soo xirey dhar jaalle ah dabadeedna dhammaantood qudha looga jarayo meel badda agteeda ah.
Madaxweynaha Masar Cabdulfataax Al-siis oo telefishinka dalkiisa ka hadlay, wuxuu falkaas ku tilmaamey mid waxashnimo ah oo ka durugsan mabaadi'da saxan ee Islaamka iyo bini aadamnimada.
Sisi ayaa sidoo kale ku hanjabey in dowladiisu xilliga iyo sida ugu haboon ugu aargudi doonto muwaadiniinteeda Libya lagu diley.
GAROWE ONLINE
