Maraykanka: 50 qof oo lagu dilay weerar ka dhacay Orlando
-
- Posted On 12-06-2016, 07:00PM
Weerar lagu qaaday goob habeenkii lagu caweeyo oo ku taalla magaalada Orlando gobolka Florida ee dalka Maraykanka, ayaa lagu dilay in kabadan 50 ruux, waxaana ku dhaawacmay 53 kale siday caddeeyeen saraakiil katirsan booliiska dalkaasi.
Dadkan ayaa dhammaan waxaa toogtay qof hubaysnaa kaasoo u dhashay magaalada New York, balse asal ahaan kasoo jeeda dalka Afghanistan.
Booliiska ayaa markii dambe ruuxaasi dilay, kadib markii uu afduubtay qaar kamid ah shakhsiyaadkii weerarka ka badbaaday.
Booliiska ayaa ku waramay, inay baarayaan dhacdadan qaabka ay u dhacday, iyogoo sheegay inay kala caddayn doonaan weerarkan inuu xiriir la leeyahay Argagixiso iyo in kale.
Sawirro iyo muuqaalo lagu baahiyay baraha bulshada gaar ahaan Twitterka, ayaa muujinayay gurmad xooggan oo ay sameeyeen ciidamada Booliiska oo wata baabuur gaashaaman iyo kuwa gargaarka, in kastoo ay jiraan kuwo dhaawacyo soo gaareen sida lagu baahiyay boogga rasmiga ah ee Booliiska Orlando.
Magaalada Orlando, ayaa waxaa maalmahan kusoo badanayay toogashooyinka, waxaana dhawr maalin ka hor la dilay fanaan caan ah oo waqtigaasi kasoo baxday riwaayad ay ku dhigtay mid kamid ah baararka ku yaalla magaaladaasi.
