Mareykanka oo dharbaaxadii ugu horeysay ku dhuftay Taliban

Maamulka Biden ayaa xanibay kaydadka dowladda Afgaanistaan ​​ee ku jiray akoonnada bangiyada Mareykanka.

WASHINGTON, USA - Maamulka Biden ayaa xanibay kaydadka dowladda Afgaanistaan ​​ee ku jiray akoonnada bangiyada Mareykanka Axaddii kana horjoogsaday Taalibaan inay helaan lacagtaas oo ah balaayiin doollar.

Laba qof oo si dhow ula socda arrintan una waramay The Washington Post ayaa xaqiijiyey xayiraadda waxaana ay sabab uga dhigeen "in wali uusan caddeyn nooca dowlad ama nidaam ee Talibaan ku fekereyso".

Washington ayaa sidoo kale waxay u badan tahay in ay wajahdo xulashooyin adag oo ku saabsan sida loo maareynayo cunaqabateynta dhinaca dhaqaalaha ee ay horey ugu soo rogtay falaagadda.

Haddii ay sii jirto xayiraadda, waxaa laga cabsi qabaa in ay adkeyso in gargaar bani'aadamnimo oo caalami ah la gaarsiiyo dadka Afgaanistaan oo la fahansan yahay in ay maalintii ku nool yihiin wax ka yar $2 doolar.

Keydka dowladii hore ee Afqaanistaan ​​waxaa lagu qiyaasay $9.4 bilyan dhammaadkii Abriil, sida ay sheegtay IMF. Inta badan kaydkaas waxay taalaa meel ka baxsan Afgaanistaan, sida ay ilo wareedyo u sheegeen AFP.

Dowladda Mareykanka ayaa horay u qabatay kaydka dalal aysan dowladdooda aqoonsanayn, sida Venezuela oo ay dib ugu fasaxdey markii ay aqoonsi ku meelgaar ah siisay hogaamiyaha mucaaradka.

Dhaqdhaqaaqa deg degga ah ee Taalibaan ay kula wareegeen Afgaanistaan ​​markii ay ka baxeen ciidamada Mareykanka iyo kuwa xulafada la ah ayaa beesha caalamka sidda muuqaneysa wuxuu ka dhigayaa dibad-joog.

Isniintii, Xoghayaha Arrimaha Dibedda ee Britain, Dominic Raab ayaa sheegay in UK ay ka fikireyso inay cunaqabateyn ku soo rogto Taliban. Mr Raab wuxuu xusay in ay adeegsanayaan hab kasta si ay u cadaadiyaan kooxda.

GAROWE ONLINE