Sacuudiga iyo Ruushka oo ka wada hadlay amniga marin-biyoodka Hormuz iyo Baabul Mandab

RIYADH - Wasiirka Arrimaha Dibadda Sacuudiga, Amiir Faisal bin Farhan Al Saud, ayaa kulan la yeeshay dhiggiisa Ruushka, Sergey Lavrov, iyaga oo ka wada hadlay xaaladaha gobolka iyo amniga isu-socodka maraakiibta ee marin-biyoodka Hormuz iyo Baabul Mandab.

Kulanka ayaa ka dhacay dalka Mareykanka, dhinacyada shirka wasiirrada arrimaha dibadda ee dalalka G20, sida ay sheegtay Wasaaradda Arrimaha Dibadda Sacuudiga.

Labada wasiir ayaa si gaar ah diiradda u saaray xaaladihii ugu dambeeyay ee Yemen iyo amniga maraakiibta ganacsiga ee mara labada marin-biyood ee istaraatiijiga ah ee Hormuz iyo Baabul Mandab, kuwaas oo muhiim u ah isu-socodka ganacsiga iyo shidaalka caalamka.

Sidoo kale, labada dhinac ayaa dib u eegay xiriirka laba geesoodka ah ee Sacuudiga iyo Ruushka, iyaga oo ka wada hadlay dadaallada lagu xoojinayo amniga iyo xasilloonida gobolka.

Kulankan ayaa muujinaya muhiimadda ay labada dal siinayaan amniga marinnada badda ee gobolka, gaar ahaan xilli ay jiraan xiisado saameyn ku yeelan kara isu-socodka maraakiibta iyo ganacsiga caalamiga ah.

GAROWE ONLINE