Trump oo shaqadii ka eryay Xeer ilaaliye guud
-
- Posted On 31-01-2017, 12:25PM
WASHINGTON, USA- Madaxweynaha dowladda Maraykanka Donald Trump, ayaa shaqadii ka eryay Xeer ilaaliyihii guud ee dalkaas kadib markii ay ka hortimid go'aanka lagu mamnuucayo qaxootiga ka imaanaya 7 dal oo ku yaalla Bariga dhexe iyo Africa.
Haweenayda lagu magacaabo Sally Yates, oo xilkaas si KMG ah ugu magacaabay Madaxweyne Obama ayaa waraaq u dirtay laamaha caddaaladda dalkaas iyadoo sheegtay inuusan dastuurku ogolaanayn xayiraadda la saaray muslimiinta soo galootiga ah.
Warqad ay u dirtay qareennada wasaaradda cadaaladda Maraykanka, isla markaana lagu daabacay warbaahinta, ayay ku sheegtay in amarka Trump la horgeeyay maxkamado heerar kala duwan leh.
Madaxweyne Trump ayaa awood u leh inuu xilka ka qaado Xeer ilaaliyaha guud, wuxuuna booskaas u soo magacaabay mas'uulka lagu magacaabo Jeff Sessions, kaasoo sugaya inay ansixiyaan golaha Senetka dalkaas.
Tallaabada uu qaaday Madaxweynaha dhawaan la doortay ayaa keentay caro xoog leh iyo dibad-baxyo ay dhigayaan bulshada waddankaas, waxaana ka qayb galay mas'uuliyiin katirsan Xisbiga Dimuqraadiga oo muujiyay inaysan ku faraxsanayn saxiixyada uu samaynayo Donald.
Sidoo kale tiro diblomaasiyiin Maraykan ah ayaa diyaariyay warqad ay ku cambaareynayaan amarkaas oo ay sheegeen in aanu ammaan u horseedi doonin dalka.
Afhayeenka u hadlay Aqalka Cad, oo lagu magacaabo Sean Spicer, ayaa sheegay in laga badbadiyay dhaliisha ku aaddan amarka uu madaxweynaha Maraykanka ku mamnuucayay qaar ka mid ah dadka soo galaya dalkaasi.
Madaxweynihii hore ee dhawaan xafiiska baneeyay Brack Obama ayaa durba muujiyay sida uu ugasoo horjeedo go'aamada uu qaadayo ninkan ku cusub siyaasadda, wuxuuna sheegay in muwaadiniinta dalkaas xaq u leeyihiin inay ka hor yimaadan tallaabooyinka Qaldan.
Trump ayaa sidoo kale waraysi uu siiyey Telefishanka ka hadla arrimaha Masiixiyiinta Christian Broadcasting Network ayaa sheegay dadka Kirishtaanka ah ee u dhashey dalka Siiriya in iyaga la soo dhaweynaayo taas oo muujineysa in go’aankiisu yahay mid diin gaar ah la fuquuqayo.
GAROWEONLINE
