Turkiga oo ka hadlay xaaladda Al-Baqdaadi xili la sheegayo in "la dilay"
-
WARIYAHA ANKARA GAROWE ONLINE
- Posted On 27-10-2019, 02:57PM
ANKARA, Turkey – Mas'uul sarre oo ka tirsan dowladda Turkiga ayaa wuxuu la hadlay xaaladda hogaamiyaha Daacish, Abuubakar Al-Baqdaadi, xili la sheegayo "in la dilay".
Wakaaladda wararka afka dheer ee Reuters ayaa mas'uulkan aan la magacaabin kasoo xigtay in Baqdaadi uu goobta duulaanku ka dhacay tagay 48-saac kahor inta aan la fulin.
Balse wuxuu ka gaabsaday sarkaalkan in uu xaqiijiyo in Al-Baqdaadi uu ku geeriyooday gulufkaas la sheegay in uu aad u qorsheysanaa.
Ciidamadda Mareykanka ayuu xusay in ay kusoo wargeliyeen howlgalka oo ka dhacay magaaladda Idlib ee waqooyi barri Suuriya.
"Turkiga wuxuu sii wadi doonaa in uu dhinacyadda ku dhow isugu duwo howlgaladooda," ayuu hadalkiisa raaciyay.
Xeel-dheereyaasha ayaa hadalkan ku macneeyay in ugu yaraan xukuumadda Ankara ay kaalin ka qaadatay khaarijinta Baqdaadi, waase hadii la xaqiijiyo.
Wasaaradda Gaashaandhiga xukuumadda Washington ayaa laga soo xigtay in ay rumeysan yihiin in Baqdaadi ku dhintay howlgalka.
"Balse ma hubno in howlgalku ahaa mid guuleystay," ayuu raaciyey sarkaal magaciisa qariyey oo saxaafadda xogta u dusiyey.
Donald Trump ayaa lagu wadaa in uu saacadaha soo aadan soo saaro "war-saxaafadeed weyn" oo la aaminsan yahay in uu daaran yahay howlgalka ay ka fuliyeen dalkan Carbeed.
GAROWE ONLINE
