Turkiga oo wacad ku maray inuu galayo dagaalka Mosul
-
- Posted On 23-10-2016, 01:51PM
ANKARA, Turkey- Xukuumadda Ankara, ayaa ka hadashay dagaalka kasocda magaalada Mosul ee waddanka Ciraaq kasoo u dhaxeeya ciidamo huwan ah iyo mallayshiyaadka kooxda isku magacowday dowladda Islaamiga ah ee ISIS.
Turkigu, wuxuu sheegay in dowladaha Ciraaq iyo Maraykanku ku fashilmeen inay ka run sheegaan ballanqaadkii ahaa inaan ciidamada dagaallamaya ee dhinaca xukuumadda Baqdaad kasocda lagu darin Kurdiyiinta iyo shiicada.
Wuxuu sheegay in tallaabadaas laga maarmaan ka dhigayso in Turkigu ka galo dagaalka islamarkaana faraha ka laaban waxa kasocda magaalada Mosul maalintii 7aad.
Ra'iisulwasaaraha Turkiga Binali Yildirim ayaa sheegay inay muhiim tahay in dowladiisu ay qaado tallaabo ay dagaalka uga qayb galayso.
Wuxuu walaac kamuujiyay in kooxaha Shiicada xasuuq ka gaystaan magaalada Mosul oo ay ku badanyihiin Sunniyiinta Ciraaq oo cadaawad xoogan kala dhaxayso.
Kumaan kamid ah dadkii ku sugnaa magaaladan, ayaa u qaxay Baqdaad iyo dhinaca dalka Suuriya.
Ciidamada isku dhafka ah ee ay ku jiraan Kurdiyiinta iyo Shiicada, ayaa iska caabin xoog leh kala kulmay Daacish oo aad ugu xoogan magaalada Mosul.
Wariyaasha ku sugan jiida hore, ayaa ku waramaya in mallayshiyaadka Daacish adeegsanayaan weeraro is-qarxin kuwaasoo loo isticmaalayo baabuur laga soo buuxiyay walxaha qarxa islamarkaana lala beegsanayo fariisimada ciidamada Ciraaq.
Balse, ciidamada ayaa hadda adeegsanaya qoryaha lidka Diyaaradaha si meel fog baabuurtaasi loogu qarxiyo.
GAROWEONLINE
