Al-shabaab oo soo weerartay fariisinkii ciidanka DF ee Raage Ceele
-
- Posted On 13-07-2015, 07:37AM
July 13, 2015 (GO)- Ugu yaraan todoba qof ayaa ku geeriyoodey ku dhowaad toban kalena way ku dhaawacmeen dagaal goor hore oo saaka ahayd ka dhacay deegaanka Raage-Ceelle ee gobolka Shabeellada Dhexe.
Dagaalka oo ahaa mid culus islamarkaana socdey muddo labo saac ku dhow, wuxuu bilowdey kadib markii kooxo ka tirsan Shabaabku weerar gaadmo ah kusoo qaadeen fariisimo ciidamada dowladdu deegaankaas ku leeyihiin.
Wararka ayaa intaas ku daraya in mileeshiyaadka Al-shabaab muddo kooban la wareegeen deegaanka, inkastoo ay markii dambe dib uga baxeen.
Dhanka kale, ciidamada AMISOM oo iyaguna fariisin ciidan kuleh duleedka tuulada, ayaa lagu soo warramayaa inaysan dagaalka si toos ah uga qayb gelin balse ay madaafiic soo ridayeen iyagoo sal-dhiggooda ku sugan.
Dowladdu weli wax war ah kama soo saarin dagaalka saaka dhacay, balse af-hayeen u hadlay Al-shabaab ayaa sheegan in ay si buuxda ula wareegeen deegaanka Raage-Ceelle, islamarkaana khasaare xooggan gaarsiiyeen ciidamada dowladda hub iyo gaadiidna ka qabsadeen.
Raage-Ceelle wuxuu kamid yahay deegaano dhowr ah oo ka tirsan gobolka Shabeellada Dhexe, kuwaas oo sanadkii hore Al-shabaab laga saarey.
GAROWE ONLINE
