AMISOM oo la wareegtay Amniga goobaha doorashada Hir-Shabeelle
-
- Posted On 22-11-2016, 01:22PM
JOWHAR, Somalia- Gudiga Doorashada maamulka Hir-Shabeelle ayaa shaaciyay in maanta oo Talaado ah dib loo billaabay Doorashada Xildhibaanada Aqalka Hoose, oo mudo 5 maamlood ah u xirnayd Khilaaf iyo Isqab-qabsi.
Wasiirka Dhalinyarada iyo Cayaaraha Maxa'ed Cabdillaahi Xuseen Nuux, ayaa mas'uul ka ahaa Hakadka Doorashada Aqalka Hoose ee Hir-Shabeelle, kadib markii ciidan uu wato ay Fowdo sameeyeen.
Khilaafka keenay dib u dhaca Doorashada, ayaa la sheegay in la xaliyay kadib markii ay dadaallo sameeyeen Mas'uuliyiin ka socotay Dowladda Somalia ee waqtigu ka dhammaaday, AMISOM, UN-ka iyo maamulka Hir-Shabeelle.
Dhanka kale, Ciidamo ka socdo dalka Burundi, oo qeyb ka ah Howlgalka AMISOM ayaa saakay la wareegay Mas'uuliyadda amniga xarunta Doorashada maamulka Hir-Shabeelle ee magaalada Jowhar.
Doorashada Aqalka Hoose ee ka socdo dalka, ayaa aad loogu dhaliiyay Musuq-maasuq, Cod-gadasho iyo Handadaad lagu sameynayo Ergada Beelaha ee ka qeybgalaya Doorashada.
Doorashada Aqalka Hoose oo mudo 15 maalmood ka socoto Caasimadaha Maamulada Puntland, Koonfur Galbeed, Galmudug, Jubbaland iyo Hir-Shabeelle ayaa ilaa hadda waxaa lagu doortay ku dhawaad 120 Xildhibaan, oo ka qeyb ah 275-ka Xubnood ee Baarlamaanka.
GAROWEONLINE
