Aqalka Sare ee baarlamaanka Soomaaliya oo dooranaya guddoon
-
WARIYAHA MUQDISHO GAROWE ONLINE
- Posted On 26-04-2022, 06:06AM
MUQDISHO, Soomaaliya – Senatarada Golaha Aqalka Sare ee Baarlamaanka Soomaaliya ayaa maanta oo Talaado ah dooranaya Guddoomiye iyo labadiisa ku xigeen oo xubnaha u tartamaya ay dhageysteen hadal jeedintooda 23kii April 2022.
Musharixiinta ayaa saacadihii lasoo dhaafay sameeyay dedaallo ay kula xaajoonayaan Senatarada Codeynaya si musharax weliba uu ugu guuleysto xilka uu u tartamo ee uu dedaalka xooggan geliyay.
Guddoomiyaha Guddiga Doorashada Guddoonka Aqalka Sare BFS Senataro Aadan Cabdinaasir oo Warbaahinta la hadlay ayaa sheegay in ka guddi ahaan diyaar ay u yihiin qabashada doorashadaan si aqalkaan uu yeesho Guddoon rasmi ah.
Xarunta lagu dooranayo Guddoonka Golaha Aqalka oo ay tageen xubno katirsan Guddiga Aqalkaas u qaabilsan qabsoomidda Doorashadaan ayaa la kulmay saraakiisha amniga mas’uulka ka ah iyo xubnaha Farsamada ee doorashada kala shaqeynaya.
Murashaxiinta Xilka Guddoomiyaha:
1.Senator Cabdi Xaashi Cabdullaahi
2.Senator Saalax Axmed Jaamac
3.Senator Cismaan Obokor Dubbe
Murashaxiinta Guddoomiye ku xigeenka 1-aad
1.Senator Cabdixakiin Macalin Axmed
2.Senator Cali Shacbaan Ibraahin.
Murashaxiinta Guddoomiye ku xigeenka 2-aad
1.Senator Ilyaas Badel Gaboose,
2.Senator Cabdullaahi Shiikh Ismaaciil (Fartaag)
3.Senator Cabdullaahi cali Xersi
4.Senator Sareedo Maxamed xasan
5.Senator Xasan Xuseen xaaji
6.Senator Cabdiwali Maxamed Ibraahim (Xaabsade)
7.Senator Cabdi Cismaan Xareed.
Doorashada Guddoonka Aqalka Sare ayaa ka dhigeysa in billooyin kaddib uu aqalkaas yeelanayo Guddoon rasmi ah si uu u billaabo kulamada iyo howlaha horyaalla oo qaarkood qabyo u ahaa Baarlamaankii 10aad ee JFS.
Hadii ay maanta si nabad galyo ah ku qabsoonto doorashada gudoonka Aqalka waxa ay ka dhigan tahay in dalka uu galay xaalad doorashado dowlad sharciyad haysatana ay dalka ka dhalato maadaama hay’adaha dowlada waqtigoodu dhamaaday 8 February 2022.
GAROWE ONLINE
