Badmaaxiin u dhashay India oo xoog lagu soo furtay
-
- Posted On 12-04-2017, 01:00PM
Somalia:
GALKACYO,
Somalia- Ciidamada Nabad Sugida Somalia (NISA), ayaa saaka xoog
kusoo furtay 8 Badmaaxiin, oo u dhashay dalka India, kuwaasi oo gacanta ugu
jiray koox burcad-badeed ah.
Taliyaha ciidamada Nabad Sugidda Galmudug Saadiq Joon ayaa sheegay in Howlaglka lagu soo furtay Ajaanibta uu ka dhacay duleedka deegaanka Ceel-huur ee Koofurta Gobolka Mudug.
Badmaaxiinta lasoo badbaadiyay ayaa la socday Markabka Al Kausar, oo 31-kii March laga afduubay xeebaha Somalia, xilli Badeecooyin Ganacsi uu u waday magaalada Kismaayo, ee xarunta Jubbaland.
Markabka iyo labo Badmaax, ayaa laga soo furtay Burcad-badeeda labo maalmood kahor, kadib howlgal qorsheysan oo ka dhacay meel ku dhaw degmada Hobyo.
Falalka burcadda ayaa dib ugu soo laabtay xeebaha Somalia, waxaana tan iyo bishii hore la qafaashay ilaa dhowr markab.
Tallaabadan ayaa loo aanaynayaa Maraakiibta Jariifka oo dhibaato xooggan ku haya Kalluumaysatada kuwaasoo xilliyo kala duwan keenay cabashooyin la xariira arrintan.
GAROWEONLINE
