Barlamanka oo ansixiyay Wasiirrada maamulka Hir-Shabelle
-
- Posted On 11-03-2017, 04:16PM
JOWHAR, Somalia- Barlamanka maamulka HirShabelle ayaa maanta oo sabti codka kalsoonida siiyay Golaha Wasiirada uu soo magacaabay Madaxweyne Cali Cabdullaahi Cosoble Bishii lasoo dhaafay.
Kulanka ay ku yeesheen magaalada Jowhar oo ay soo xaadireen 84 Mudane, ayaa waxaa u codaysay ansixinta Golaha Wasiirrada 71 Xildhibaan, iyadoo 13 kale ay ka aamuseen codeynta oo ahayd mid gacan-taag ah.
Madaxweyne Cosoble ayaa hadal uu ka jeediyay xarunta golahaas kaga codsaday Xildhibaanada in la taageero Golahiisa xukuumadda.
Wasiirada cusub oo ka kooban 52 xubnood, oo isagu jira wasiirro, ku xigeenno iyo wasiiru dowlayaal ayaa noqonaya kuwii ugu horeeyay oo maamulkaasi yeesho tan iyo markii la aas-aasay sanadkii tagey.
Xildhibaanno dhowr ah, iyo Siyaasiyiin ayaa mudooyinkii ugu dambeeyay waday Mooshin ay ku diidan yihiin shakhsiyaadka lasoo magacaabay, oo ay ku sheegeen in aan laga wada qeyb-gelin dhammaan Beelaha.
Dhanka kale, waxaa xalay ka dhacay meel ku dhaw Madaxtooyada Hir-Shabelle ee magaalada Jowhar labo qarax oo ahaa Bambooyinka gacanta laga tuuro kuwaasi oo aan geysan Khasaaro.
GAROWEONLINE
