Ciidamada DF oo Gedo ku qabtey sarkaal sare oo ka tirsan Al-shabab
-
- Posted On 01-02-2015, 07:00PM
February 1, 2015 (GO)- Saraakiisha ciidamada Dowladda Federaalka ee gobolka Gedo ayaa shaaciyey inay qabteen sarkaal sare oo ka tirsan kooxda Al-shabaab.
Jaamac Muuse oo ka tirsan taliyeyaasha ciidamada dowlada ayaa sheegay in sarkaalka la qabtey oo in muddo ah ku dhuumaaleysanayey miyiga gobolka Gedo kamid yahay qaybta Al-shabaab u qaabilsan diyaarinta walxaha qarxa.
Jaamac Muuse faah faahin kama bixin qaabka lagu qabtey ninkaas mana sheegin magaciisa, wuxuuse xaqiijiyey in maalmaha soo socda loo soo wareejin doono dhanka magaalada Muqdisho warbaahintana loo soo bandhigi doono.
Bishii December ee sanadkii hore 2014 ayey ahayd markii uu ciidamada Dowlada Federaalka ee gobolka Gedo isu soo dhiibey Zakariye Ismaaciil oo ka tirsanaa hoggaanka sare ee Al-shabaab.
Kooxda Al-shabaab oo laga saarey badi magaalooyinkii ay koonfurta dalka kaga sugneyd, waxay weli ka arimisaa deegaano ka tirsan gobollada Jubbooyinka iyo Gedo.
Madaxweynaha Maamulka Jubaland Axmed Maxamed Islaan oo labo todobaad kahor warbaahinta la hadlay, wuxuu sheegay inay dhowaan bilaabayaan hawlgal ballaaran oo Al-shabaab looga sifeynayo gobollada Jubooyinka iyo Gedo.
GAROWE ONLINE
