Ciidamo arbushay banaanbax cadaalad loogu goobayey Ikraan

Warbixinada ayaa intaas ku daraya in ciidanka ay xireen kadibna dhula ku jiideen saxafi ka qeyb-qaadanayey banaanbaxa.

MUQDISHO, Soomaaliya - Ciidamada dowlada Soomaaliya ayaa awood ku joojiyey banaanbax cadaalad loogu goobayey Ikraan Tahliil Faarax oo si kooban uga qabsoomay isgoyska KM4 ee caasimadda Muqdisho.

Sida ay sheegayaan wararka, askarta oo ahaa cutubyo ka tirsan booliska ayaa xarig iyo jirdil isugu daray qaar kamid ah ka qeybgaleyaasha banaanbaxa oo badankooda ahaa dhalinyaro.

Warbixinada ayaa intaas ku daraya in ciidanka ay xireen kadibna dhula ku jiideen saxafi ka qeyb-qaadanayey banaanbaxa kaasoo lagu magacaabo Bashiir Maxamuud wallow xorriyadiisa uu dib u helay.

Dadka waxyeelada kasoo gaartey rabshada ciidamadda waxaa kamid ah Axmad Garaar oo ah hoggaamiyaha garabka dhalinyarada Xisbiga Wadajir, sida uu sheegay Cabdiraxmaan Cabdishakuur Warsame.

Warsame oo qudhiisa ah musharax madaxwayne iyo hogaamiyaha xisbiga Wadajir ayaa qoraal uu ku daabacay bartiisa gaarka ah ee Facebook-ga wuxuu ku caddeeyay in uu aad uga xun-yahay falkaas.

"Waxaan si xoog leh u cambaaraynayaa xadgudubka ay ciidanka booliska u geysteen dibad baxayaasha ka dhiidhiyey dilkii Ikraan Tahliil, gaar ahaan wariye Bashiir Maxamad oo ka tirsan warbaahinta Goobjoog iyo Axmad Garaar oo ah hoggaamiyaha garabka dhalinyarada Xisbiga Wadajir. Hay’adaha Amniga weli waxay ku shaqeeyaan dhaqan kala talis," ayuu yiri.

Wuxuu ku daray: "Raysalwasaare Rooble waxaa looga fadhiyaa in uu tilaab ka qaado kuwa xadgudubka ku kacay, hay’adaha amnigana ka sifeeyo dhaqanka caburrinta ee sanadihii la soo dhaafay lagu carbiyey".

Isu-soo-baxaan ayaa yimid xilli ra'iisul wasaaraha xilgaarsiinta Rooble uu 48-saacadood u qabtey madaxa hay'ada sirdoonka Fahad Yaasiin Daahir in uu warbixin rasmi ah uga soo gudbiyo mustaqbalka haweenaydda.

GAROWE ONLINE