Dagaal khasaare badan geystey oo ka dhacay Shabeellada Hoose
-
- Posted On 23-05-2015, 11:30AM
May 23, 2015 (GO)- Ugu yaraan soddon qof ayaa ku dhintey dagaal ciidamada Dowladda Federaalka Soomaaliya iyo Al-shabaab ku dhex maray deegaannada Aw-dheegle iyo Mubaarak ee gobolka Shabeellada Hoose.
Guddoomiyha Aw-dheegle Maxamed Aweys Abuukar ayaa VOA u sheegay in dagaalka oo ahaa mid culus uu bilowdey xalay saqdii dhexe markaasoo kooxo Al-shabaab ka tirsani soo weerareen fariisimo ciidamada dowladdu ku sugnaayeen.
Maxamed Aweys ayaa sidoo kale sheegay in dagaalka ay ku dhinteen 19 askari oo ka tirsanaa ciidamada dowladda isagoo xusey in dhanka Al-shabaab ay ka dileen lix iyo labaatan dagaal-yahan.
Guddoomiyaha Aw-dheegle ayaa dhanka kale sheegay in Al-shabaab ka faa'iideysatey maqnaanshaha ciidamada AMISOM oo todobaadyo kahor deegaanadaas isaga baxay.
Al-shabaab ayaa todobaadkii hore muddo kooban la wareegtey Aw-dheegle inkastoo markii dambe ay dib uga baxeen.
GAROWE ONLINE
