Diiwaangalinta Murashaxiinta oo Muqdishu kasocota
-
- Posted On 26-01-2017, 01:19PM
MUQDISHU, Somalia- Waxaa saaka Muqdishu ka billowday diiwaan-gelinta Murashaxiinta Doorashada Madaxweynaha Somalia, oo la qaban doono 8-da Bisha Febuary, 2017.
Madaxweynihii hore ee dowladdii KMG Sheekh Shariif Sheekh Axmed, ayaa noqday Murashaxii ugu horeeyay ee iska diiwaan-geliyay Xarunta Villa Hargeysa, oo ku taalla Madaxtooyada dalka.
Is-diiwaangelinta oo socon doonto Saddexda maalin ee soo socoto (Khamiis, Jimco iyo Sabti), ayaa waxaa laga qaadayaa murashax kasta lacag gaareysa $30,000 (Sodon Kun oo Doolarka Mareykanka).
Xildhibaanada Labada Aqalka ee Barlamanka oo dhawaan si wadajir ah ugu shiray Muqdishu ayaa go'aamiyay in dhaqaalaha diiwaangelinta Murashaxiinta 50% lagu caawiyo dadka ay saamaysay abaartu.
Murashaxiin aad u badan, oo uu kamid yahay Madaxweynaha uu waqtigiisu dhammaaday Xasan Sheekh Maxa'uud ayaa u taagan qabashada xilka Madaxweynaha Somalia afarta sano ee soo socoto.
Beesha caalamka ayaa walaac ka muujisay dib u dhaca faraha badan ee Doorashada dalka, oo markii 5-aad dib loo dhigay maalintii shalay.
GAROWEONLINE
