Dowladda Federaalka oo amartay in la joojiyo shirka Baydhabo
-
- Posted On 10-11-2014, 10:15AM
November 10, 2014 (GO)- Dowladda Federaalka Soomaaliya ayaa amar ku bixisay in muddo labo todobaad ah la hakiyo shirka dhismaha maamulka koonfur galbeed ee bilihii u dambeeyey ka soconayey degmada Baydhabo ee xarunta gobolka Baay.
Go'aanka lagu hakinayo shirka waxaa si wadajir ah maanta u saxiixay saddexda mas'uul ee ugu sareeya Dowaladda Federaalka oo kala ah Madaxweyne Xasan Shiikh Maxamuud, Ra'iisul Wasaare Cbadiweli Shiikh Axmed Maxamed iyo Gudoomiyaha Baarlamaanka Maxamed Shiikh Cismaan Jawaari.
Qoraal kasoo baxay madaxtooyada Villa Somalia oo nuqul kamid ahi soo gaarey GO ayaa lagu sheegay in sababta talaabadaas loo qaaday tahay maadaama qaabka shirku u socdo wax badani ka khaldan yihiin.
Dhanka kale waxaa xubnaha gudigii Dowladda Federaalku horay ugu saartay inay shirkaas maamulaan lagu amray wadatashi inay Muqdisho ugu soo laabtaan.
Go'aanka lagu joojiyey shirka Baydhabo waxaa sida ila wareedyo lagu kalsoon yahay GO u xaqiijiyeen dabada ka riixaya Gudoomiyaha Baarlamaanka oo isagu cabsi weyn ka qaba in Xildhibaan Shiriif Xasan Shiikh Aadan loo doorto madaxweynaha maamulka koonfur galbeed.
Halakaan ka akhri qoraalkaan oo saxiixan
GAROWE ONLINE
