Dowladda Soomaaliya oo wajahaysa caqabado ka dhashay joojinta gargaarka Mareykanka

MUQDISHO, Soomaaliya (Garowe Online) – Soomaaliya ayaa isku dayaysa inay la qabsato xaalad dhaqaale oo sii adkaanaysa kaddib markii Mareykanka uu hoos u dhigay gargaarkiisii dibadda, sida uu sheegay Wasiiru-dawlaha Arrimaha Dibadda ee Soomaaliya.

Ali Cumar Cali [Ali Balcad] ayaa sheegay in Maraykanku weli leeyahay dano istaraatiiji ah oo ku qasbaya inuu sii joogto Soomaaliya, gaar ahaan dhinaca iskaashiga la-dagaallanka argagixisada ee ka dhanka ah Al-Shabaab iyo Daacish.

“Waxaan aqoonsanay isbeddelkan, waxaana isku dayaynaa inaan la qabsanno,” ayuu yiri Ali Balcad, isaga oo intaa ku daray in dhimista gargaarka Mareykanku aysan ku koobnayn Soomaaliya oo keliya, balse ay ka tarjumayso dib-u-eegis ballaaran oo lagu sameynayo gargaarka dibadda adduunka.

Sannadkii la soo dhaafay, Washington waxay adkaysay siyaasaddeeda gargaarka dibadda, iyadoo barnaamijyo badan la geliyay dib-u-eegis, hakad, iyo dib-u-habayn.

Gargaarka la joojiyay ayaa gudaha Soomaaliya carqaladeeyay qaybo ka mid ah nidaamkii muddo dheer taageerayay gargaarka bini’aadantinimo iyo adeegyada horumarineed.

Bishan horaanteeda, Wasaaradda Arrimaha Dibadda ee Mareykanka ayaa ku dhawaaqday in la hakiyay kaalmadii ay siin jirtay dowladda federaalka Soomaaliya, iyadoo ku eedeysay mas’uuliyiin Soomaaliyeed inay waxyeeleeyeen xarun ay taageereen deeq-bixiyeyaashu oo ay leedahay Hay’adda Cunnada Adduunka (WFP) isla markaana ay leexsadeen sahay gargaarka.

GAROWE ONLINE