Ergada dooranaysa Xildhibaanada Somaliland oo cabsi galin lagu hayo [Akhriso]
-
- Posted On 05-12-2016, 03:20PM
MUQDISHU, Somalia- Odayaasha iyo Ergada Somaliland ee Doorashada Aqallada Hoose iyo sare ee ka socoto Muqdishu ayaa sheegay in lagu hayo Cabsi-gelin iyo Handadaad xoogan, oo uga imaanaysa Madax katirsan dowladda Somalia.
13 Oday oo kamid ah Beelaha Gobolada Waqooyi ee Somaliand ayaa u qoray Gudiga Doorashada Warqad, oo ay ku dalbanayaan in xarunta lagu qabanayo doorashadooda loo wareejiyo saldhigga AMISOM ee Xalane.
Odayaasha ayaa sheegay inay la kulmeen xarig, Handadaad iyo Cabsi-gelin uu ku samaynayo Wasiirka Warfafainta Somalia Maxa'ed Cabdi Xayir Maareeye iyo Madax kale oo katirsan dowladda Federaalka.
Doorashada Aqalka Hoose, ee Beelaha Waqooyi (Somaliland) oo dhawaan laga bilaabay xarunta Gaadiidka Booliska Degmada Cabdicasiis ayaa joogsatay markii la xiray Oday kamid ah Ergada Doorashada.
Ra'iisul Wasaare Cumar Cabdirashiid, ayaa ka hadlay Xarigga iyo Faragelinta lagu hayo Hannaanka Doorashada dalka, isagoo ugu baaqay Guddiga Amniga inay wax ka qabtaan dhibaatooyinka lagu hayo Ergada iyo Musharaxiinta.
Beelaha degan gobolada Somaliland ayaan wali dooran xubnaha ay ka heleen Labada Aqal ee Baarlamaanka Federaalka Somalia, kuwaasoo tiradooda lagu sheegay Aqalka Hoose: 46 halka kan Aqalka Sare 11.
GAROWEONLINE
