Fahad Yaasiin Daahir oo hakad geliyey isu-socodka Beledwayne

Gacanta midig ee Farmaajo ayaa u tartamaya xubinimadda Golaha Shacabka baarlamaanka Soomaaliya.

BELEDWAYNE, HirShabelle – Wadooyinka Waaweyn ee Magaalada Beledweyne ayaa Axada maanta ah u xiran doorashada kursiga Fahad Yaasiin oo codayntiisa ka dhacayso Xarunta gobolka Hiiraan sida ay Garowe Online u sheegeen goobjoogayaal.

Ciidamo farabadan oo iskugu jira dowladda Soomaaliya iyo Hir-Shabeelle ayaa lagu arkayaa waddooyinka waaweyn ee Magaalada, waxaana xeritaanka waddooyinka ay saameeyeen Ganacsiga Magaalada.

Qaar kamid ehellada dadkii shalay ku dhintay qarixii Beledweyne ayaa  sheega in ay saaka la’yihiin waddooyin ay maraan si ay meydadka u Aasaan maadaama la xiray wadooyinka magaaladda dhamaantood.

Goordhow ayaa waxaa la filayaa in Magaalada Beledweyne ka bilaabato doorashada lix kamid ah kuraasta Golaha Shacabka.

Kuraasta maanta codayntooda la qabanayo waxaa ka mid ah HOP086 oo mar kale Guddiga doorashada Hirshabeelle lagu amray inuu hakiyo balse ay iska indha tireen sida uu ogaaday Garowe Online.

Kursiga tirsigiisu yahay HOP#086 waxaa u sharaxan yahay Fahad Yaasiin Xaaji Daahir oo hada Beledweyne ku sugan. Fahad ayaa xalay la kulmay hogaan maamulka Hirshabeelle.

Ra’iisul Wasaare Maxamed Xuseen Rooble oo isku dayey inuu kursigaan hor istaago ayaa ku guul dareystay, kadib markii ay ka hor yimaadeen inta badan xubnaha guddiga doorashada heer Federaal iyo maamulka Hirshabeelle.

GAROWE ONLINE