Farmaajo “Ahmiyad gaar ah ayaan siinayaa Danyarta”
-
- Posted On 03-05-2017, 04:08PM
MUQDISHU, Somalia- Madaxweynaha dowladda Federaalka Somalia, Maxamed Cabdullaahi Farmaajo ayaa booqday xeryo ay ku jiraan dad barakacayaal ah kahor intuusan saaka ka dhoofin magaalada Muqdishu.
Farmaajo ayaa dadkaas ka waraystay xaaladooda isagoo mid u gacan qaaday kuwaasoo u badnaa dumar iyo carruur.
Madaxweynaha ayaa u muujiyay naxariis wuxuuna ugu laab qaboojiyay in dowladdu taageero gooni ah u fidin doonto.
Madaxweynaha Somalia, ayaa dadkaas u geeyay Baco iyo Bustayaal, maadama lagu jiro xilli Roobaad, wuxuuna sheegay inaysan ka caajisi doonin sidii loo caawin lahaa.
Qoraal kooban oo ku faafiyay bartiisa Twitterka Madaxweyne Farmaajo ayaa qiray in dowladdiisu si daacad ah ugu adeegi doonto shacabka islamarkaana ahmiyad gooni ah iska saari doonto dadka danyarta ah.
“Waxaa iga go'an in aan si daacad ah ugu adeego shacabka Soomaaliyeed, ahmiyad gaar ahna siiyo danyarta,” Ayuu madaxweynuhu ku qoray bartiisa Twitterka.
Booqashadan ayaa kusoo aaday xilli maalinkii labaad Muqdishu uu ka socdo shir golaha xukuumaddu uga hadlayaan dar-darin kalinta shaqada dowladda iyo u adeegista shacabka.
GAROWEONLINE
