Farmaajo oo diidey magacaabida uu sameeyay Rooble

MUQDISHO, Soomaaliya - Villa Soomaaliya ayaa sharci darro ku tilmaamtay xil ka qaadista ra'iisul wasaaraha xilgaarsiinta Rooble ku sameeyay wasiirka amniga, Xasan Xundubey.

Ra'iisul Wasaaraha xilgaarsiinta Maxamed Xuseen Rooble ayaa Cabdullaahi Maxamed Nuur u magacaabay Wasiirka Amniga Gudaha. Wuxuu bedelayaa Xasan Xundubey Jimcaale.

"Madaxweyne Maxamed Cabdullaahi Farmaajo ayaa adkeeyay in shaqada laga doonayo haatan xukuumadda ay ahayd inay dhammeystirto doorashooyinka Goleyaasha Barlamaanka ee ka bilowday dalka, lagana sugayo sii joogtaynta hawlaha muhiimka ah ee horyaalla," ayaa la raaciyey war-saxaafadeedka Villa Soomaaliya.

Hoos ka akhriso bayaanka Villa Soomaaliya

XIL KA QAADISTA WASIIR XUNDUBEEY MA AHA MID WAAFAQSAN DASTUURKA

Muqdisho, Sebteembar 8, 2021: Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa sheegay in aysan dhaqan gal ahayn xil ka qaadis kasta oo lagu sameeyo xubin ka tirsan Golaha Wasiirada Xukuumadda Federaalka Soomaaliya ilaa ay ku timaaddo si waafaqsan Dastuurka KMG ah ee dalka.

Madaxweynaha oo cuskanaya Qodobka 90aad, Xarafka (e) ee Dastuurka KMG ee dalka oo dhigaya “Awoodaha Madaxweynaha waxaa ka mid ah inuu xilka ka qaadayo Wasiirrada, Wasiiru-dawleyaasha, iyo Wasiir-ku-xigeennada, markuu soo jeediyo Wasiirka Koowaad.” ayaa sheegay in xil ka qaadista Wasiirka Amniga Gudaha Mudane Xasan Xundubeey aysan ku imaanin sifo sharci ah, sidaas darteedna aysan dhaqan gal ahayn.

“Xil ka qaadista iyo magacaabista xubnaha Golaha Wasiirada ma aha dhaqan gal ilaa ay ku timaaddo hannaan waafaqsan Dastuurka Kumeel Gaarka ah ee dalka.” Ayuu yiri Madaxweynaha.

Madaxweyne Maxamed Cabdullaahi Farmaajo ayaa adkeeyay in shaqada laga doonayo haatan xukuumadda ay ahayd inay dhammeystirto doorashooyinka Goleyaasha Barlamaanka ee ka bilowday dalka, lagana sugayo sii joogtaynta hawlaha muhiimka ah ee horyaalla.

DHAMMAAD

Xiisada sii kululaatay ee Farmaajo iyo Rooble waxaa xudun u ah kiiska Ikraan Tahliil Faarax taasoo ka tirsaneyd hay'ada sirdoonka Soomaaliya balse la waayey in ka badan laba bilood kahor.

GAROWE ONLINE