Farmaajo oo soo saarey wareegto la xiriirta dhul boobka

Digreetadan ayaa kusoo aadaysa xilli uu jiro guux la xiriira in uu jiro isku dayo dhul-boob ah.

MUQDISHO, Soomaaliya - Madaxweynaha muddo xileedkiisa uu dhamaadey Farmaajo ayaa soo saarey xeer uu ku sheegay "in uu kaga hortagayo boobka dhul dan guud ah," sida ay shaaca ka dhigtey Villa Soomaaliya.

Sida laga soo xigtay war-saxaafadeed ay xalay faafisay Madaxtooyadda, dowladda federaalka Soomaaliya waxaa waajib ku ah in ay u ilaaliso hantidaas si ka caaggan damac shakhsi iyo maamul xumo".

"Ma jiro muwaadin ama maalgashade sifo sharci ah looga iibin karo, looga kirayn karo, ama loogu hibeeyn karo dhulalka danta guud wixii ka danbeeyey 8-dii Febraayo, 2017," ayaa lagu yiri nuqul mid ah digreetada.

Farmaajo oo la sheegay in uu xaqiijinayo in aysan jirin cid gaar ah oo xaq u leh in ay la wareegaan, iibsadaan ama kireystaan si hareer marsan dastuurka iyo qawaaniinta dalka, ayaa soo saarey qodobada;

1. Waxaa Xeer Madaxweyne lagu joojiyey heshiis kasta oo ku saabsan kala wareejinta, iibka, kireynta iyo qaab kasta oo la xiriira ka macaashka dhulka danta-guud, inta laga soo dhammeystirayo xeerarka iyo shuruucda Baarlamaan ee hageysa.

2. Maadaama Sharci Baarlamaanka Federaalku uu soo saaro ay xaddidi doonto baaxadda, muddada iyo shuruudaha rukhsadaha istcimaalka dhulka Danta-guud, lama bixin karo ruqsad ku saabsan isticmaalka si kumeel gaar ah ama abadiga ah ee berriga, badda iyo hawada sare ee Jamhuuriyadda Federaalka Soomaaliya.

3. Iyadoo la tixgelinayo xilligan dalku uu u jiheystay doorashada, Masuulkii isku daya in uu bixiya ama la wareego dhulalka danta guud, waxa uu qaadayaa masuuliyadda ka dhalata iyo cawaaqibta sharci ee la xiriirta ku takri-falka awoodda, dayacaadda danaha Qaranka iyo musuqmaasuqa amaanada shacabka Soomaaliyeed.    

4. Ma jiro muwaadin ama maalgashade sifo sharci ah looga iibin karo, looga kirayn karo, ama loogu hibeeyn karo dhulalka danta guud wixii ka danbeeyey 8-dii Febraayo, 2017, sida lagu caddeeyay wareegtadii kasoo baxday Xafiiska Madaxweynaha 18kii Jannaayo 2018.  Sidaas darteed dukumiinti iyo saxiix kasta oo arrinka la xiriira waxay ka dhigan yihiin sharci darro lagu muteysan karo ciqaab.

5. Xeerkan wuxuu adkaynayaa wareegtadii dhaqangalka ahayd ee soo baxday 18kii Jannaayo 2018 ee la xiriirtay ku takri-falka iyo musuqmaasuqa dhulalka danta guud.

Dhawaqan ayaa kusoo aadaya xilli maalmihii lasoo dhaafay uu jirey guux ka imaanayey siyaasiyiin kaasoo ku saabsanaa in madax sarre ay ku mashquulsan yihiin in ay kala guurka kaga faa'iideystaan boobka dan guud.

GAROWE ONLINE