Guddoomiyaha cusub Banaadir oo Muqdishu yimid
-
- Posted On 13-04-2017, 12:10PM
MUQDISHU, Somalia- Guddoomiyaha cusub ee gobolka Banaadir Taabid Cabdi Maxamed ayaa maanta soo gaaray magaalada Muqdishu caasumadda Somalia, isagoo kasoo kicitimay waddanka Maraykanka oo uu aaday wax yar ka hor intaan jagadaas loo dhiibin.
Mas'uuliyiin katirsan dowladda Somalia iyo maamulka gobolka ayaa kusoo dhaweeyay magaalada Muqdishu.
Taabid ayaa lagu wadaa in maalinta Sabtida uu xilka laga wareego, waxaana guddiga qabana qaabada ay sheegayaan in xaflad soo dhaweyna ah loogu samayn doono caasumadda Somalia.
Mas'uulkan ayaa booska kala wareegi doono Madaale oo xilkaas soo hayay mudadii ugu dambaysay xukuumaddii Xasan Sheekh.
Guddoomiyaha cusub ayaa horay usoo ahaa Safiir ku-xigeenka safiirka Somalia ee Mareykanka ahna Qunsulka Guud ee Washington, oo loo magacaabay labo sanno ka hor.
6-dii Bishan April ayaa Madaxweynaha JFS Mudane Maxamed C/llaahi (Farmaajo) waxa uu Ambassador Thaabid Cabdi Maxamed u Magacaabay Guddoomiyaha Gobolka Banaadir Ahna Duqa Magaalada Muqdishu.
GAROWEONLINE
