Hantidhowraha DFS oo sheegay in loo hanjabey
-
- Posted On 21-01-2015, 04:06AM
January 21, 2015 (GO)- Hantidhowraha guud ee Dowlada Federaalka Soomaaliya ayaa sheegay in is hor taag lagu sameeyey shaqada xafiiska Hantidhowrka oo ku dhex yaala xarunta madaxtooyada ee Villa Somalia.
Nuur Jimcaale Faarax oo shir-jaraa'id magaalada Muqdisho ku qabtey, wuxuu sheegay in maamulka iyo shaqaalaha xafiiska loo hanjabey islamarkaana loo diidey inay gudaha usoo galaan xarunta madaxtooyada.
Hantidhowraha ayaa dhanka kale xusay in ilaalada madaxtooyadu rasaas ku fureen gaarigiisa, amarkaasna bixiyeen saraakiisha hoggaamisa ilaalada madaxtooyada, waa sida uu hadalka u dhigaye.
"xafiiska Hantidhowrku waa shaqeyn la'yahay...waxaa loo diidey gaarigeygu inuu soo galo madaxtooyada, waxaa laysku dayey in dhib la ii geysto...waxaa iska cad inaan la rabin wadankani inuu horay u maro isla xisaabtankana la meel mariyo" ayuu yiri.
Ugu dambeyntii wuxuu sheegay in xafiiska Hantidhowrku dadaal badan ku bixiyey sidii hantida qaranka loo ilaalin lahaa, balse ay jiraan qaar kamid ah mas'uuliyiinta ugu sarreysa dowladda oo arintaas aan raali ka ahayn.
GAROWE ONLINE
