Hoobiyaal lagu weeraray Saldhigyo AMISOM ku leedahay Qoryooley
-
- Posted On 15-10-2016, 02:03PM
QORYOOLEY, Somalia- Weerar Hoobiyaal ah ayaa lagu qaadey xalay Fiidkii saldhigyo military oo ciidamada Midowga Africa, ee AMISOM ku leeyihiin degmada Qoryooley, ee gobolka Shabeellaha Hoose.
AMISOM ayaa sheegtay in weerarka lagu qaadey Fariisamaha ciidamadeeda Qoryooley ka dhashay khasaarooyin isagu jiro dhimasho iyo dhaawac, oo gaarey dad shacab ah.
Weerarka waxaa ku geeriyootay labo Gabdhood oo isla dhashay, kuwaasi mid kamid ah ahayd da'deeda 9 Jir lagu sheegay, waxayna naftooda ku waayeen hoobiye ku dhacay Gurigooda, sida lagu caddeeyay qoraal kasoo baxay AMISOM.
AMISOM waxay sheegtay in Gabadha yar ay ku dhimatay Gurigeeda, halka Haweenayda ay dhaawac soo gaarey ugu geeriyootay Isbitaal ay ciidamada AMISOM ku leeyihiin duleedka bari ee Qoryooley.
Mid kamid ah Dadka deegaan ayaa GO u sheegay in Madafiicda ay ahaayeen kuwa uga yimid dhanka dibadda Magaalada, islamarkaana aysan kala saari karin cida soo tuurtay AMISOM iyo Al shabaab.
Dhan kale, Al shabaab ayaa qiratay in weerar kale saaka ku qaadeen ciidamo katirsan AMISOM oo marayay deegaanka Buulo Sheekh, oo qiyaastii 5Km dhanka Bari uga beegan degmada Qoryooley.
Todobaadkii hore ayay ahayd markii madafiic AMISOM lagu weeraray waxyeello kasoo gaartay dad shacabb ah.
GAROWEONLINE
