Hotel Dayax ee ku yaal magaalada Muqdishu oo la weeraray
-
- Posted On 25-01-2017, 09:55AM
Labo qarax oo ismiidaamin ah ayaa lagu weeraray hotel lagu magacaabo Dayax oo ku yaallo meel ku dhaw Isgoyska Sayidka, kana fogeyn xarunta Baarlamaanka Soomaaliya ee magaalada Muqdishu.
Qaraxa kowaad waxaa loo adeegsaday gaari nooca xamuulka qaada, waxaana xigay qarax kale oo isna ahaa gaari nooca NOAH ah, oo ay la socdeen rag hubaysan oo gudaha u galay Hotel Dayax.
Hotel-ka Dayax ayaa waxaa daganaa yihiin xildhibaano ka tirsan Baarlamaanka cusub ee Somalia.
Wararka ayaa sheegay in ugu yaraan 5 ruux ay ku dhimatay weerarka, dad badana ay ku dhaawacmeen.
Dadka goobjooga u ahaa weerarka ayaa u sheegay GO in khasaaraha uu ka badan karo 5 qof, maadaama ay jiraan dad badan oo dhaawacyo culus soo gaaray, oo loo qaadey Isbitaalada.
Fah-faahinta kala soco wararkeena dambe haddii alle idmo.
GAROWEONLINE
