Jidad laami ah oo maanta xarigga laga jarey Garowe iyo Bosaso
-
- Posted On 10-03-2015, 02:29PM
March 10, 2015 (GO)- Madaxweynaha Puntland Cabdiweli Maxamed Cali Gaas ayaa maanta si rasmi ah xarigga uga jaray labo waddo oo laami ah oo laga hirgeliyey caasimadda Puntland ee Garowe.
Labadan jid ayaa Madaxweynuhu wuxuu dhagax dhigey sanadkii hore ee 2014, waxaana lagu fuliyey mashruuca horumarinta degmooyinka JPLG ee ka soconaya qaar kamid ah degmooyinka waaweyn ee Puntland.
Gaas oo munaasabadii furitaanka si kooban uga hadlay wuxuu lagama maarmaan ku tilmaamay dhismaha jidadka oo halbowle u ah koboca dhaqaalaha, isu socodka dadka iyo gaadiida; iyo weliba kor u qaadista bilicda caasimada.
Duqa Garowe Cabdicasiis Nuur Cilmi Koor oo isna goobta ka hadlay ayaa bulshada ugu baaqay inay ilaashadaan waddooyinka maadama ay yihiin hanti dadka oo dhan ka dhexeysa si guudna loogu wada manaafacaadsanayo.
Dhanka kale, waxaa isla maanta xarigga laga jaray jid laami la saarey oo isku xira madaxtooyada Bosaso iyo suuqa, jidkan oo horay loo oran jirey Netco dhererkiisuna yahay 2km waxaa loo bixiyey magac cusub oo ah Benderqasim.
Munaasabaddii lagu furayey jidkan waxaa kasoo qayb galay wasiirro, xildhibaanno, maamulka gobolka Bari, maamulka degmada Bosaso iyo weliba xubno metelayey qaybaha kala duwan ee bulshada.
GAROWE ONLINE
