Jubbaland: Axmed Madoobe oo booqday furimaha dagaalka [Sawirro]
-
- Posted On 22-04-2017, 06:10PM
KISMAYO, Somalia- Madaxweynaha Jubbaland Axmed Madoobe ayaa booqasho ku tagay deegaanka Cabdalla Biroole ee gobolka Jubbada hoose, oo dhawaan laga saarey Al shabaab.
Madaxweyne Axmed Madoobe oo ay wehliyaan Saraakiil ciidan ayaa socdaal dhanka dhulka ah ku gaarey jiida dagaalka, oo uu kula kulmay ciidamada Jubbaland iyo kuwa AMISOM.
Gaadiidka gaashaaman ee ciidamada AMISOM ayaa lagu geeyay Axmed Madoobe Deegaankaas, oo 45KM dhanka Waqooyi uga beegan magaalada Kismaayo, ee xarunta gobolka Jubbada hoose.
Madaxweynaha ayaa Warbixino ka dhagaystay Saraakiisha iyo hogaanka ciidanka ku sugan Cabdalla Biroole, isagoo uga mahadceliyay dedaalkooda ku aadan la-dagaallanka Al shabaab.
Madoobe ayaa ku dhiira-galiyay ciidamada inay qeyb ka qaataan gurmadka abaaraha, islamarkaana ay isku furaan waddooyinka, gargaarka loo gaarsiiyo shacabka dhibaataysan.
Wuxuu xusay Madaxweynaha Jubbaland in ciidamadu iskuu diyaariyaan howlgal military oo Al shabaab looga saarayo guud ahaan gobollada Jubbooyinka iyo Gedo.
Maamulka Jubbaland ayaa dhowr jeer horey u shaaciyay duullaan ka dhan ah Al shabaab, mana jirto ilaa hadda wax ka hirgalay arrimahaas.
GAROWEONLINE
