Khilaafka Barlamanka dowlada Federaalka oo weli taagan
-
- Posted On 14-11-2014, 07:16PM
Jimce, Nov 14,2014 [GO]- Wararka laga helayo xubno ku dhow guddoonka Barlamanka Somalia ayaa warsidaha GO u sheegey inuu weli taagan yahay khilaafkii u dhexeeyey xildhibaanada kala tageersan madaxda sare ee dowlada Federaalka.
Kulankii Barlamanka Federaalka Somalia ayaa Talaadadii '11 Nov,2014' lasoo dhaafey ku dhamaadey buuq iyo sawaxan kadib markii xildhibanada loo qaybiyey qoraalka mooshin ka dhan ah Ra'isal wasaaraha Somalia.
Wararkaan ayaa sheegaya in guddomiyaha Barlamanka Somalia Jawaari ku guuleysan waayey inuu ku qanciyo xildhibaanada tageersan Ra'isal wasaaraha Somalia iney ogolaadaan in mooshinka horyaala Barlamanka cod loo qaado.
Dhinaca kale waxaa weli halkiisii tagaan khilaafka u dhexeeyey madaxda sare ee Somalia iyadoo wararka laga helayo Villa Somalia sheegayaan iney guul dareysteen gabi ahaanba dadaalo dheraad ah oo la isugu soo dhoweyn lahaa Madaxweynaha dowlada Somalia iyo Ra'isal wasaare Cabdiweli Shiikh.
Madaxweynaha dowlada Federaalka Somalia Xasan Shiikh ayaa gabi ahaanba ku gacan sayrey heshiis uu la galo Ra'isal wasaare Cabdiweli Shiikh isagoo ku adkeysanaya in mooshinka Barlamanka la geeyey waqtigiisa la siiyo.
Beesha caalamka aaya niyad jab ka muujisay khilaafka siyaasdeed ee Somalia iyadoo kulankii la filayey in Denmarka lagu qabto qarka u saaran yahay inuu gabi ahaanba bur-buro.
Dowlada Denmarka ayaa baajisay kulan ka horeyeey kan beesha caalamka kaasoo la isugu keeni lahaa qurba-joogta Somalia iyo madaxda dowlada Federaalka gaar ahaan Madaxweyne Xasan Shiikh.
GAROWEONLINE
