Kismaayo: sarkaal ka tirsanaa nabad-sugidda oo toogasho lagu diley
-
- Posted On 11-07-2015, 07:04AM
Sarkaal ka tirsanaa ciidamada nabad-sugidda ee Jubaland ayaa maanta magaalada Kismaayo lagu diley.
Labo nin wejiga soo duubtey kuna hubeysnaa bistoolado ayaa lagu soo warramayaa inay dhowr xabadood madaxa uga dhufteen xilli uu marayey agagaarka xaafadda Shaqaalaha.
Dableyda dilka geysatey oo aan ilaa iyo hadda haybtooda la aqoonsan ayaa durbadiiba goobta ka baxsaday.
Ciidamada ammaanka Jubaland oo daqiiqado kadib soo gaarey halka uu dilku ka dhacay ayaa sameeyey hawlgal baaritaan ah oo muddo kooban socdey.
Booliska ayaa xiray dhowr qof oo falkaas lala xiriirinayo, kuwaas oo xilligan su'aalo lagu weydiinayo saldhiga dhexe ee booliska Kismaayo.
Xaafadda Shaqaalaha waxa horay uga dhacay qaraxyo iyo dilal qorsheysan, kuwaas oo lala beegsaday mas'uuliyiin iyo ciidamo Jubalnad ka tirsan. Weerarradaas badankooda waxaa mas'uuliyaddooda sheegtay Ururka Alshabaab.
GAROWE ONLINE
