Koonfur Galbeed: Xulista 5 kursi Aqalka Hoose oo la asteeyay

Doorashada Golaha Shacabka ayaa dhawaan la go’aamiyay in muddo 40 cisho gudahood ah lagu soo gabagabeeyo.

BAYDHABO, Koonfur Galbeed – Guddiga Hirgelinta Doorashada Koonfur Galbeed ayaa shaaciyay in dhawaan ay qaban doonaan doorashada shan kursi oo ka mid ah kuraasta Golaha Shacabka Baarlamaanka 11-aad ee dalka xilli laga digay dib u dhaca codaynta oo la qorsheeyay in la soo gabagabeeyo 25 February 2022.

Guddiga ayaa Shaaciyay in doorashada 5ta kursi ee tirsigoodu uu kala yahay184,85,156,176 iyo 45 ay dhici doonto 18/01/2022 oo ku beegan Talaadada soo socota.

Kuraasta la shaaciyay horay waxaa ugu fadhiyay Xasan Cbdinur Cabdi, Maxamed Cabdalla Xuseen, Xil. Maxamed Murasal Maxamuud (Boorow), Xil. Cali Cabdi Cismaan iyo Xil.Raabco Sheekh Nuur.

Doorashada Golaha Shacabka ayaa dhawaan la go’aamiyay in muddo 40 cisho gudahood ah lagu soo gabagabeeyo iyadoo cadaadis xoog leh uu saaran yahay dowlada federalka Soomaaliya sidii ay doorashada ugu soo gabagabeyn lahayd jadwalka lagu heshiiyay.

Shirkii Golaha Wadatashiga Qaran ee Muqdisho kusoo dhammaaday 9-kii Janaayo ayaa lagu go’aamiyey in doorashada Golaha Shacabka lagu soo afjaro 45 maalmood gudahood, oo ka billaabata 15-ka Janaayo kuna eg 25-ka Febraayo.

HOOS KA AKHRISO BAYAANKA

GAROWE ONLINE