Madaafiic lagu tuuray xarunta Villa Somalia
-
- Posted On 30-03-2017, 02:00PM
MUQDISHU, Somalia- Dhowr hoobiye ayaa ku dhacay gudaha iyo nawaaxiga xarunta Madaxtooyada Somalia ee Muqdishu, xilli Gollaha wasiirada cusub ay kulan ku leeyihiin Xafiiska Ra'iisul wasaare Kheyre.
Madaafiicda ayaa labo kamid ah waxay ku dhaceen Villa Somalia, waxaana ku dhaawacmay labo haween ah, sida ay GO u xaqiijiyeen ilo wareedyo ku sugan Madaxtooyada.
Qaar kale oo hoobiyaasha kamid ah waxay ku dhaceen Xaafaddaha 15-May ee dhabarka dambe ee Aqalka looga taliyo dalka Somalia.
Lama oga khasaaraha dadka shacabka ah kasoo gaarey duqeyntaas.
Dadka deggan nawaaxiga Villa Somalia, oo aan la xiriirnay ayaa noo sheegay inay aad ugu argagaxeen madaafiicda kusoo dhacday xaafadooda.
Ciidamada Nabad Sugida iyo Booliska dowladda Somalia ayaa gaarey goobaha ay hoobiyaashu kusoo dhaceen waxayna billaabeen baaritaanno la xiriirta halka laga soo tuurey.
Majirto cid sheegatay, balse waxaa falalka noocaan ah Muqdishu ka gaysata kooxda Al Shabaab.
GAROWEONLINE
