Madaxweynaha Hirshabelle oo gaaray Magaalada Baledweyne
-
- Posted On 04-01-2017, 04:33PM
BELEDWEYNE, Somalia - Wafdi ballaaran, oo uu hogamainayo Madaxweynaha maamulka Hir-ShabelleCali C/llaahi Cosoble ayaa maanta gaarey magaalada Beledweyne, ee xarunta gobolka Hiiraan.
Wararka Warsidaha Garowe Online kasoo gaareyo Beledweyne, ayaa sheegay in Wafdiga Madaxweyne Cosoble ay kamid yihiin Xildhibaano kasoo jeeda gobolka Hiiraan, oo ka tirsan Baarlamaanka cusub ee Somalia.
Madaxweynaha maamulka Hir-Shabelle Cali C/llaahi Cosoble ayaa waxaa la socdo Xildhibaan C/llaahi Goodax Barre, oo lagu soo waramayo inuu dhex-dhexadinayo Cosoble iyo Ugaas Khilaaf Ugaas Xasan.
Ugaas Khilaaf Ugaas Xasan, ayaa si aad ah uga soo horjeeda maamulka Hir-Shabelle, oo uu sheegay in wadadii loo maray dhismihisa aysan ku qancin Bulshada Hiiraan.
Amniga magaalada Beledweyne ayaa si aad ah loo adkeeyay maanta, waxaana iska kaashanayay ciidamada dowladda Somalia iyo kuwa ka socda dalka Jabuuti ee qeybta ka ah AMISOM.
Madaxweynaha Hir-shabelle Cali C/llaahi Cosoble iyo Wafdigiisa ayaa waxay kulamo kula qaateen qeybaha kala duwan ee Bulshada iyo Saraakiil sare xarunta Maamulka Gobolka ee Baledweyne.
Waa Safarkii labaad, oo Cali C/llaahi Cosoble ku tago Beledweyne tan iyo markii loo doortay Madaxweynaha maamulka Hir-Shabelle Bishii October, ee sanadkii 2016-ka.
GAROWEONLINE
