Maxamed Cali Ameeriko oo loo diidey in uu galo Beledweyn
-
- Posted On 16-08-2015, 10:29AM
August 16, 2015 (GO)- Wararka ka imaanaya magaalada Baledweyne ee xarunta gobolka Hiiraan ayaa sheegaya in safiirkii hore ee Soomaaliya u joogey dalka Kenya, Maxamed Cali Nuur Ameerika lagu celiyey kantaroolka waqooyi ee xiga dhanka degmada Matabaan.
Amarka dib loogu celiyey Ameeriko ayaa la sheegay in uu bixiyay guddoomiyaha gobolka Hiiraan Cabdifitaax Xasan Afrax oo hada ku sugan magaalada Muqdisho ee caasimadda Dalka Soomaaliya.
Maxamed Cali Nuur Ameeriko ayaa dib ugu laabtay degmada Matabaan oo ay gacanta ku hayaan ururka Ahlusunna Waljamaaca.
Warar hoose oo Garowe Online heshay ayaa sheegaya in Mudane Ameeriko damacsan yahay inuu isu soo taago xilka madaxweynaha maamulka la damacsan yahay in loo sameeyo gobollada Hiiraan iyo Shabeellada Dhexe.
Safiirkii hore ee Soomaaliya u fadhiyay Kenya Maxamed Cali Nuur Ameeriko ayaa todobaadyadii u dambeeyey socdaal ku marayey deegaanno ka tirsan Jubbaland, Koofur Galbeed,Puntland iyo Galmudug.
GAROWE ONLINE
