Musharixiinta oo ka hadlay raafka Somaliland ee Laascaanood

MUQDISHO, Soomaaliya - Midowga Musharixiinta Soomaaliya ayaa qoraal wadajir ah kasoo saarey barakicinta iyo xad-gudubka dadka kasoo jeeda Koonfurta loogu geysanayo magaaladda Laascaanood, ee Caasimadda gobolka Sool.

Waxay sheegeen inay aad uga xun yihiin raafka maamulka Somaliland kawado magaaladda, ee lagu beegsanayo dadka shacab ah ee magaaladda maciin biday inay ku noolaadaan markii ay dagaallo iyo abaaro ay kasoo barakiciyeen degaanadoodii koonfurta dalka.

Sidoo kale Musharixiinta ayaa tilmaamay inay cambaareynayaan falkan lidiga ku ah Islaamnimada, Soomaalinimada, xaquuqul insaanka, walaaltinimada iyo wadajirka umadda Sooamaaliyeed.

Waxay ugu baaqeen waxgaradka, aqoonyahanka iyo qeybaha bulshadda Laascaanood inay u istaagaan joojinta dhibaatooyinka iyo raafka ay Somaliland u geysanayaso dadka walaalahooda ah ee ku dhex nool.

Somaliland ayaa la kulantay cambaareyn iyo cadaadis gudaha iyo dibadda kadib markii in ka badan 3,000 oo qof oo reer Koonfur ah ay kasoo saartey si qasab ag magaaladda Laascaanood, iyagoo ku daboolaysa tallaabadan fashil dhanka amniga ah oo soo wajahay.

GAROWE ONLINE