Miisaanid la horgeeyay Barlamanka Somalia
-
- Posted On 15-02-2017, 08:24PM
MUQDISHU, Somalia- Miisaanid ay shalay meelmariyeen Golaha wasiirrada Waqtigeedu dhammaday kadib kulan aan caadi ahayn oo ay ku yeesheen Muqdishu, ayaa maanta la horgeeyay golaha wakiillada Somalia.
Qorshahan ayaa dood badan dhaliyay kadib markii hanti-dhowraha guud ee qaranka Dr. Nuur Faarax Jimcaale uu sheegay inaan shuruucdii dawladda la marin.
Wasiirkii hore ee Maaliyadda xukuumaddii hore Maxamed Aadan Fargeeti, ayaa ka hadlaysa sababta miisaaniyaddan u meel-mariyeen iyagoo waqtigeedu dhammaaday islamarkaana dadkii ku shaqayn lahaa aan wali lasoo magacaabin.
Inkastoo qorshahan uu difaacay mudane Fageeti, wuxuu ganafka ku dhuftay in arrimaha miisaaniyadda uu soo dhex-galo Hanti-dhowraha Qaranka isagoo xusay hadii ay khaldantahay soo celinteeda looga fadhiyo Barlamanka Somalia.
Isagoo la hadlayay VOA, wuxuu sidoo kale iska fogeeyay lacag malaayiin doollar ah oo ka maqnayd xisaab xirkii la sameeyay sannadkii hore, isagoo tilmaamay in arrintaas looga fadhiyo xafiiska hanti dhowrka inay cadeeyaan maadama aysan jirin lacag dowladda ka baxda oo aan marin xafiiskaas.
Balse Xafiiska Hanti-dhowraha Qaranka Somalia Dr. Nuur Faarax Jimcaale, ayaa cadeeyay in lagu xad-gudbay sharcigii dalka u yaallay kadib markii la baal-maray qaabkii loo gudbin lahaa miisaaniyadda.
Miisaaniyaddan oo dhan 201 Milyan oo dollar, ayaa la qorsheeyay inay ka bilaabato April iyadoo ay ku egtahay December.
Miisaaniyada ay shalay ansixiyeen Golaha Wasiirada ayaa waxaa uu ka yar yahay middii sanadkii 2016, iyadoo dhowaan Baarlamaanka Soomaaliya uu dib u celiyay miisaaniyada saddexda bilood ee uu soo bandhigay Wasiirka Maaliyadda.
Miisaaniyada sanadkan 2017 waxaa ku jira qarashka ku baxaya Aqalka Sare oo ah mushaaraadka ay qaadanayaan Senatorada, oo ah $3,000 Senator-kasta.
Lama yaqaan tallaabada Barlamanku ka qaadi doonaan qorshaha uu diiday Hanti dhowraha oo ku doodaya in lifaaq sharciyan uu ku lahaa laga reebay.
GAROWEONLINE
