Muqdisho: labo qof oo ku dhintey qarax ka dhacay Dharkeynley
-
- Posted On 19-01-2015, 04:45AM
January 19, 2015 (GO)- Labo qof ayaa ku geeriyoodey qarax gelinkii dambe ee shalay ka dhacay degmada Dharkeynley ee magaalada Muqdisho.
Daa'uud Cabdulaahi Nuur oo ka tirsan maamulka Dharkeynley ayaa sheegay in qaraxaasi diley labo nin oo dhallinyaro ah, kuwaasoo la socdey mooto saddex-lugoodley ah (BAJAJ).
Wuxuuna intaas ku daray in labada nin qorsheynayeen weerar ay magaalada Muqdisho ka geystaan, balse ku qaraxday miino macmal oo ay horay usoo diyaarsadeen.
Ma ahan markii ugu horeysey ee magaalada Muqdisho uu ka dhaco qarax kuwii dhigayey ku geeriyoodeen.
Qaraxyada lagu rakibo gaadiidka ayaa labadii sano ee ugu dambeeyey aad ugu soo badanayey magaalada Muqdisho, waxaana xusid mudan in sanadkii lasoo dhaafay ee 2014 qaraxyada caynkaas ah lagu khaarijiyey tobanaan qof oo mas'uuliyiin dowladda ka tirsan iyo rayidba isugu jirey.
GAROWE ONLINE
