Musharaxiin Khudbado ka jeeday Gollaha Shacabka Soomaaliya

MUQDISHO, Soomaaliya – Lix kamid ah Musharaxiinta isku soo sharaxay qabashada xilka Gudoomiyaha Baarlamaanka ayaa maanta Khudbado u jeediyay Xildhibaanada Gollaha Shacabka.

Musharaxiinta oo dhamaan Xildhibaanno ah ayaa kusoo bandhigay Khudbadahooda qorshiyaashooda siyaasaadeed, khibradahooda shaqo iyo waxyaabaha ay qaban doonaan, haddii ay xilka ku guuleystaan.

Lixda Musharax ee maanta lagu billaabay Khubad Jeedinta Musharraxiinta ayaa kala ah;

1. Xildhibaan Ibraahim Isaaq Yarow
2. Xildhibaan Cali Sheekh Maxamuud Nuur
3. Xildhibaan Cabdicasiis Xasan Maxamed
4. Saalim Caliyow Ibrow
5. Xildhibaan Aadan Maxamed Madoobe
6. Xildhibaan Idiris Cabdi Dhakhtar

Maalinta berri ah waxaa Khudbad jeedin doona Shan Musharax oo uu ku jiro Wasiirkii hore ee Gaashaandhigga, Maxamed Mursal Sheekh Cabdiraxmaan, oo shalay xilka iska cailay.

Doorashada Gudoomiyaha Gollaha Shacabka ee Baarlamaanka Federaalka Soomaaliya, ayaa lagu wadaa inay dhacdo 30-ka bishan April, oo ku beegan maalinta Isniinta ah ee soo socota.

Kursigan ayaa baneeyay Maxamed Cismaan Jawaari, oo is-casiley 9-kii April, kadib is-mariwaa iyo Khilaaf Siyaasadeed oo mudo bil ah socday, iyadoo Xildhibaanada ku kala qeybsameen Mooshinkii isaga laga keenay.

GAROWE ONLINE