Nin dilay askari katirsanaa ciidamada AMISOM oo la toogtay
-
- Posted On 22-04-2017, 10:17AM
BUULO-BURDE, Hiiraan- Ciiidamada dowladda Federaalka Somalia ayaa ku guul-darraystay inay gacanta ku dhigaan Askari dhawaan dil u gaystay nin katirsanaa ciidamada Jabuuti ee qaybta ka ah howlgalka AMISOM.
Nin ciidanku dileen ayaa Maxkamadda gobolkaas amar ku bixisay in lasoo qabto isagoo nool, balse wararka aan helayno ayaa sheegaya inuu is-difaacay taasoo markii dambe keentay in ciidanku toogtaan.
Sida uu sheegay Xeer Ilaaliyaha Maxkamadda ciidamada qalabka sida ee qeybta 21aad Maxamed Cabdiqaadir Maxamed, amarkan lagusoo qabanayay marxuumkaas ayaa kasoo baxay Maxkamadda.
Sidoo kale waxaa uu tilmaamay in dhawaan Maxkamad lasoo taagi doono Askari kale oo lagu tuhmaayo in maleegay Falka lagu dilay Askariga u dhashay Jabuuti.
Askariga la toogtay oo katirsanaa ciidamada dowladda Somalia, ayaa ilaa hadda la caddayn magaciisa, balse waxaa lagu aasay degmadaas.
Muddooyinkii dambe ciidanka dowladda ayaa ku raad-joogay ninkan oo baxsad ahaa wixii ka dambeeyay falkii uu ku dilay dhigiisa oo katirsanaa ciidamada AMISOM.
Wax faah faahin ah laga bixin sababta keentay in askarigaas lagu dilo magaalada Buulo-burde todobaadkii hore.
Warar maxalli ah ayaa sheegaya in labada askari ay isku maandhaafeen arrimo la xariira gacan ka hadal loo gaystay haweenay ku sugnayd degmadaas.
GAROWEONLINE
