Qarax hotel Dayax oo lagu dilay in kabadan 10 ruux [SAWIRRO]
-
- Posted On 25-01-2017, 11:24AM
MUQDISHU, Somalia- Kooxda Al shabaab ayaa sheegtay mas'uuliyada weerarka ka dhacay Dayax hotel ee magaalada Muqdishu, kaasi oo ay ku dhinteen in kabadan 10 ruux, oo u badan dad shacab ah.
Al shabaab ayaa sheegtay in weerarka ay fuliyeen labo qof oo walxaha qarxa isku soo xiray, kuwaasoo watay labo gaari oo mid kamid ah uu ahaa nooca Xamuulka qaada kaasoo lagu qarxiyay iridda hotelka.
Sarkaal katirsan Booliska Somalia ayaa u sheegay GO in dadka ku dhintay weerarka ilaa hadda si rasmi ah loo ogeyn, balse uu arkay meyd ruux oo Gaadiidka Gurmadka ah goobta ka qaadeen.
Wuxuu sheegay in ugu yaraan 30 ruux, oo 3 kamid ah ay yihiin Sawir-qaadiyaal ka katirsan AFP, AP iyo Al Jazeera ay ku dhaawacmeen qaraxyada, islamarkaana la geeyay Isbitaallada magaalada.
Khasaaraha ayaa laga cabsi qabaa inuu intaasi kasoo kordho, maadaama ay jiraan dad ay soo gaareen dhaawacyo culus, sida ay noo sheegeen qaar kamid ah Howlwadeenada caafimaadka ee Isbitaalka Madiina.
Wararka ayaa intaas ku daraya in Xildhibaano kasoo jeedo Koonfur Galbeed oo gaaraya 7 ay ku dhaawacmeen weerarka Hotel Dayax.
Waa weerarkii labaad oo Al shabaab ka fuliso Muqdishu Bishan Gudaheeda, xilli la isu diyaarinayo doorashada Madaxweynaha Somalia.
GAROWEONLINE
