Qaraxii Muqdisho oo la cambaareeyay iyo khasaaraha oo kordhay

MUQDISHO, Soomaaliya - Cambaareyn caalami ah ayuu soo jiitay qaraxii saakay ka dhacay magaaladda Muqdisho, kaasoo ay ku dhinteen 7 qof.

Mareykanka iyo Midowga Yurub ayaa si kulul u cambaareeyay weerarka oo lala eegtay Kolonyo la socotay Saraakiil UN-ka katirsan xili ay marayeen wadada C/qaasim abaare 7:30 A.M. waqtiga Geeska Afrika.

"Howlgalka Midowga Yurub ee Soomaaliya ayaa si kulul u cambaareynaya qaraxii saakay ka dhacay magaalada Muqdisho, oo ahaa fal argagixisanimo oo fulisay Al-Shabaab. Qaraxyada kama leexin doonaan go'aanka Midowga Yurub ee ah in uu caawiyo dadka Soomaaliyeed," ayaa lagu yiri qoraal EU-da kasoo baxay.

Sidoo kale Mareykanka ayaa yiri: "Waxaan tacsi ka direynaa dadkii ku dhintay qarixii saakay, waxaana la qeybsanaynaa qoysaska xanuunka ay dareemayaan. Mareykanka wuxuu si adag u cambaareynayaa dhammaan noocyada argagixisada. Dadka Soomaaliya waxay mudan yihiin inay ku noolaadaan cabsi la'aan."

Kooxda Al-Shabaab ayaa sheegatay mas'uuliyadda qaraxa oo yimid xili dalka doorasho ka dhacayso, waxaana la ogeyn khasaaraha soo gaarey shaqaalaha UN-ka ee la bartilmaameedsadey.

Iskuul goobta ku yaallay oo Mucaasir lagu magacaabo ayaa ku burburey qaraxa, iyadoo aan jirin arday xiligaas joogtay, maadaama ay Khamiis ahayd Maanta.

GAROWE ONLINE