Rooble oo eryay Saraakiil doorasho oo ku milmay siyaasadda

MUQDISHO, Soomaaliya - Rooble ayaa qaadey tallaabo uu Axmed Maclin Fiqi ku tilmaamay qandho-jebin, taasoo uu ku eryay xubno katirsan Gudiga Xalinta Khilaafaadka doorashooyinka dalka.

Qoraal kasoo baxay Xafiiska Ra'iisul Wasaaraha Maanta ayaa lagu xaqiijiya in laga saarey Gudiga todobo xubin, oo lumiyeen madaxbanaanidii guddinimo, iyagoo ku milmay siyaasadda isla-markaana ay baal mareen xeer anshaxa doorashada.

Tani waxay ka dambeysay kulankii xalay ay yeesheen Rooble, Madaxda dowlad Goboleedyada iyo qaar kamid ah Musharixiinta mucaaradka, kaasoo u dhacay qaabka fogaan-araga ee Zoom.

Lama oga inay Midowga Musharixiinta ku qancin doonaan tallaabo uu qaadey Rooble, maadaama horey u dalbadeen in gebi ahaan la kala diro Gudiga Xalinta Khilaafaadka doorashooyinka.

Xasan Sheekh ayaa ku micneeyay shirkii xalay tallaabo loo qaadey dhanka wanaagsan, islamarkaana ay rajeynayaan in shir fool-ka-fool ah ka yeeshaan sidii lagu sixi lahaa hanaanka doorashadda dalka, oo hareeyay musuq-maasuq.

Madaxweynihii hore ayaa sheegay in mowqifkooda aan waxba iska bedelin, illaa jidka toosan loogu soo celiyo doorashadda, oo Rooble ka fulinayo dalabkooda ah inay noqoto codbixinta mid hufan, oo tartanka loo siman yahay.

GAROWE ONLINE