Rooble oo naqdiyey warbixintii NISA ee kiiska Ikraan Tahliil

Ra'iisul wasaaraha xilgaarsiinta Rooble

MUQDISHO, Soomaaliya - Ra'iisul wasaaraha xilgaarsiinta Rooble oo kasoo muuqdey muuqaal uu faafiyey telefishinka dowladda ayaa si adag wuxuu uga soo horjeestay warbixintii hay'yada sirdoonka ee kiiska Ikraan Tahliil Faarax.
 
Rooble oo sheegay in ay soo gaartey cabasho kaga timid qoyska Ikraan ayaa warbixinta wuxuu ku sifeeyay "mid aan lagu qanci karin ama aan ka jawaabeyn su'aalaha ku saabsan qadiyadan".
 
Fahad Yaasiin Daahir, agaasimaha NISA, ayuu faray in uu 48-saac gudahooda kusoo gudbiyo "warbixin dhameystiran". "Kadib waxaan qaadan doonaa go'aanka ku haboon," ayuu ku daray wasiirka koowaad ee Soomaaliya.

"Waxaan shacabka Soomaaliyeed iyo qoyska Ikraan ugu baaqayaa in ay muujiyaan deganaan, mas'uuliyad lagana fogaado in lagu xadgudbo dadka aan waxba galabsan," ayuu hadalkiisa intaas sii raaciyey.

NISA ayaa Khamiistii waxay shaaca ka dhigtey in Ikraan oo la waayey laba bilood kahor ay u gacan-gashay ayna dileen maleyshiyada Al-Shabaab. Hase ahaatee, kooxda hubeysan waxay iska fogeysay eedeyntaas.

Qoyska Ikraan oo ahayd madaxii amniga internet-ka NISA ayaa ku adkeystay in gabadhooda ay ku maqan-tahay NISA. Hooyadeed Ikraan waxay sheegtay in Aakhiro iyo Aduunyo ay haystaan Fahad Yaasiin.

Warsidaha Garowe Online ayaa ogaadey in Fahad uu dalka ka baxay maalmo kahor shaacinta dilka Ikraan. Hase ahaatee, ma cadda halka uu aadey maadaama socdaalkiisa uusan ahayn mid khuseeya arrima shaqo.

Dhawaqa Rooble ayaa yimid xilli saacadihii lasoo dhaafay ay baraha bulshadda hareeyeen sheegashooyin ku saabsan in uu go'aansadey in uu eryo Fahad oo ah gacanta midig ee madaxweynaha waqtiga ka dhacay Farmaajo.

GAROWE ONLINE