Somalia: Askar lagu gowracay duleedka Mahadaay
-
- Posted On 06-05-2017, 01:12PM
MAHADAY, Somalia- Kooxda Al shabaab ayaa saaka labo Askari oo katirsanaa ciidamada xoogga dalka Somalia ku gowracday deegaan ku yaalla duleedka degmada Mahadaay, ee gobolka Shabeellaha hoose.
Askarta ladilay oo magacyadooda lagu sheegay Mowliid Xuseen Qeylshe iyo Axmed Yacquub waxay ka tirsanaayeen guutooyinka 1-aad iyo 2-aad ee milleteriga Dowladda federaalka Somalia.
Labada Askari oo watey AK-47, ayay Al shabaab kala degtay Gaari Rakaab ah, oo ay kasoo raaceen saaka deegaanka Biyo Cadde, xilli ay marayeen meel ku dhaw degmada Mahadaay.
Saraakiisha ciidamada dowladda ee gobolka Shabeellaha hoose ayaa xaqiijiyay in Al Shabaab ay meel fagaaro ah oo ku yaalla duleedka Mahadaay ay si arxan darro ah ugu gowraceen Labadaasi Askari.
Al shabaab ayaa ku hanjabtay inay dili doonto Askari kasta, oo katirsan dowladda oo ay ku qabato jiida dagaalka ama isagoo maraya wadada deegaanada ay maamusho ee gobolka Shabeellaha dhexe.
Kooxda Al shabaab ee xiriirka la leh Al Qaacida ayaa horey u dhishay askar badan oo katirsan dowladda Somalia iyo AMISOM, kuwaasi oo ay ku qabatay dagaallada iyo weerarada ay ku qaado saldhigyadooda.
GAROWEONLINE
