Somalia: Shaqaale Caafimaad oo lagu afduubtay gobolka Hiiraan
-
- Posted On 05-04-2017, 09:30PM
BALADWEYNE, Hiiraan- Shaqaale adeegyo caafimaad oo xoolaha la xariira ka samaynayay gobolka Hiiraan ee maamulka HirShabeelle ayaa lagusoo waramayaa in maanta la afduubtay.
Shaqaalaha ayaa waxaa kaxaystay koox aan la aqoon haybtooda.
Qafaalashada ayaa ka dhacday meel qiyaastii 10KM u jirta magaalada Baladweyne oo lagu magacaabo Coola-cad.
Dadka la kaxaystay ayaa la sheegay inay katirsanaayeen ururka Xannaanada Xoolaha Goballada Dhexe, kuwaasoo waday adeegyo lagu dabiibayo xoolaha abaaruhu ku dhufteen ee ku sugan gobolka.
Xubin ka mid ah Ururka dhaqaatiirta Xanaanada Xoolaha ee Gobalada Dhexe ayaa VOA u sheegay in ragga la afduubtay oo tiradoodu ay gaareyso ilaa shan qof ay isugu jiraan dhakhtar dhinaca xoolaha ah, kalkaaliye caafimaad, laba arday iyo darawal.
Lama oga cidda kaxaysatay, balse waxaa looga shakisanyahay kooxda Al Shabaab.
Tafaasiil dheeraad ah lagama hayo halka dadkaas lagu hayo, balse wararka qaar ayaa xusaya in dhamaan dadkii laga qafaashay degaanka Caloola-cad la geeyay degaanka Luuq Jeelow oo qiyaastii 30-KM Beledweyne u jira.
Kooxdan ayaa mamnuucday in adeegyo caafimaad laga sameeyo deegaanada ay ku sugantahay.
Labo maalin kahor ayay sidaan kale u qafaasheen shaqaale caafimaad oo ku sugnaa nawaaxiga degmada Luuq ee gobolka Gedo.
GAROWEONLINE
