Soomaali siyaabo kala duwan loogu dilay India iyo Koonfur Afrika

Soomaalida ayaa ganacsiyo ku leh Koonfur Afrika. Sidoo kale, waxay Hindiya u aadaan waxbarasho iyo adeeg caafimaad.

NEW DELHI, India - Laba dhalinyaro Soomaali ah ayaa saacadihii lasoo dhaafay lagu kala dilay dalalka Hindiya iyo Koonfur Afrika, sida ay xaqiijiyeen mas'uuliyiinta Jaaliyadda ee waddamadaas.

Maxamed Fiin oo arday ahaa ayaa lagu toogtay magaalada caasimada ah ee New Delhi. Booliska wuxuu sheegay in ay soo qabteen eedeysaneyaal. Balse, ma cadda sababta loo beegsadey.

Cabdinaasir Maxamuud Cabdi oo ahaa ganacsade ayaa lagu khaarijiyey magaalda Cape Town. Kooxo burcad ah ayaa lagu waramay in ay ka dambeeyeen falkaas. Lama ogga sababta.

Taliska Booliska Koonfur Afrika ayaan wali wax war ah kasoo saarin. Madaxda Jaaliyadda Soomaalida ee dalkaas waxay sheegeen in bileyska uusan kaga jawaabin codsi ku saabsan sharaxaad.

Safaaradaha Soomaaliya ee Hindiya iyo Koonfur Afrika ayaa ka gaabsadey wicitaano warbaahinta u dirtey oo ku saabsanaa in ay ka hadlaan dhacdooyinkan lagu beegsadey muwaadiniinta.

Wasaaradda arrimaha dibadda Soomaaliya oo warsidaha Garowe Online uu la xiriiray ayaa sheegtay in ay la socoto dhacdooyinkan balse ay ka baaraan-dageyso qaabka ay uga falcelineyso.

Soomaalida ayaa ganacsiyo badan ku leh Koonfur Afrika. Sidoo kale, waxay Hindiya u aadaan waxbarasho iyo adeeg caafimaad. Balse, waxaa aad u badan xadgudubyadda loogu geystay dalalkaas.

GAROWE ONLINE