Soomaaliya: Dagaal ka dhacay Jubbada Hoose [Dhageyso]

DHOOBLEY, Soomaaliya - Sarkaal katirsan Jubbaland ayaa sheegay in dagaal u dhaxeeya Al Shabaab iyoo dad xoolo dhaqato ah uu ka dhacay deegaanka hoos-taga degmada Dhoobley ee gobolka Jubbada Hoose.

Heybe Axmed, Madaxa Ciidamada amniga Dhoobley, ee maamulka Jubbaland ayaa xaqiijiyay in dagaalka uu yimid kadib markii Al-Shabaab ay isku dayday inay si qasab ah uga qaadato shacabka Xoolo ay ZAKO ku tilmaantay.

Iska hor-imaadka ayaa waxa uu Al-Shabaab iyo xoolo dhaqatada hubaysan ku dhex-maray Tuulada Urungow, oo qiyaastii 7KM u jirta magaalada DHoobley, oo ku dhaw xuduuda Soomaaliya iyo Kenya.

Heybe ayaa tilmaamay in Ciidamada Jubbaland ay u gurmadeen shacabka Xoolo dhaqatada ah, islamarkaana la iska caabiyay Al Shabaabkii weerarka kusoo qaadey Urungow, ee doonayay inay xoolo Geel u badan ay ka qaataan dadka degan Tuulada.

Sarkaalkan amniga Dhoobley u qaabilsan Jubbaland ayaa intaasi ku daray in Al-Shabaab ay miino jidka ugu aastay Ciidamada gurmadka taasi oo uu xaqiijiyay inay geysatay khasaaro aan badnayn.

Al-Shabaab kama aysan hadlin weerarka la sheegay inay ku qaadey Tuulada Urungow, balse wararkii ugu dambeeyay ayaa sheegaya in xaaladda deegaanka lagu dagaalamay ay degan tahay.

GAROWE ONLINE