Soomaaliya oo u sii dhawaanaysa Doorashada madaxweynaha

Baarlamaanka 11aad ee Soomaaliya ayay toos ah ugu wareegtay maamulka doorashadda.

MUQDISHO, Soomaaliya – Xildhibaannada Golaha Shacabka iyo Senatarada Aqalka Sare Baarlamaanka 11aad ayaa Arbacada maanta ah leh kulan wadajir ah oo ay isaga dhex dooranayaan xubnaha Guddiga qabanqaabada Doorashada Madaxweynaha 10aad ee Soomaaliya.

Xulista Guddiga ayaa lagu saleynayaa si lamid ah xubnihii qabtay Doorashada Guddoonka labada Baarlamaanka Federaalka balse waxa ay uga duwan yihiin in Golaha Shacabka iyo Aqalka Sare wadajir u dooranayaan Madaxweynaha Dalka.

Fariin loo diray Xildhibaannada Golaha Shacabka Baarlamaanka 11aad ayaa lagu wargeliyay Ajendaha Fadhigooda maanta si ay isugu diyaariyaan howlaha horyaalla mar haddii ay soo gaabiyeen fasaxa Ciidda & Maalmaha xiga.

“Agendaha kulanka maanta ka dhacaa Villa Hargeysa waa Doorashada Xubnaha guddiga isku dhafka labada Aqal  ee BFS ee qabanqaabada Doorashada Madaxweynaha 10aad ee JFS” ayaa lagu yiri qoraalka hab dhowrka Golaha Shacabha u diray Xildhibaannada.

Fariin taas lamid ah ayaa loo diray Senatarada Aqalka Sare BFS ayaa lagu wargeliyay in kulankooda maanta uu ka dhacayo xaruntooda si uu aqalkaas u xulo xubnaha ku metalaya guddiga doorashada Madaxweynaha 10aad JFS.

Qoraalka ayaa lagu yiri: "Dhismaha iyo Ansixinta Guddiga Doorashada Madaxweynaha Jamhuuriyadda Federaalka Soomaaliya".

Guddiga Labada Gole Baarlamaanka Federaalka ee Doorashada Madaxweynaha ayaa marka lagu dhawaaqo dejinaya jadwalka Doorashada si Musharixiinta iyo Baarlamaankaba ay isugu diyaariyaan Doorashadaas.

Maalmo ka hor ayaa la soo gebagebowday codbixintii hoggaanka aqalka sare oo mucaaridku gacanta ku dhigeen. Aadan Sheekh Madoobe iyo Cabdi Xaashi ayaa ku kala guuleystay Guddoomiyeyaasha Aqalka Hoose iyo Aqalka Sare.

GAROWE ONLINE