Tahriibayaal nool iyo kuwa dhintay oo laga helay gobolka Sanaag
-
- Posted On 08-01-2016, 02:28PM
08 January, 2016(GO)-Ciidamada Badda Somaliland ayaa gacanta ku dhigay doonni la filayo inay kasoo baxday dhinaca xeebta degmada Bosaso gobolka Bari taasoo muddo todobaadyo ah ku cilladaysnayd biyaha dushooda.
Arrintaas ayaa sababtay dhimashada qaar kamid ah tahriibayaasha doontaas sida uu warbaahinta u sheegay gudoomiyaha Somaliland ugu magacaaban gobolka Sanag Axmed Cabdi Falaay.
Doontan ayaa waxaa gacanta kusoo dhigay cutub katirsan ciidamada Badda Somaliland, waxayna badbaadiyeen tahriibayaal Ethopian ah kuwaas oo 72 kamid ah noolyihiin, halka ugu yaraan 10-qof oo kalena geeriyoodeen.
Gudoomiye Falaay waxa uu sheegay in doontaas laga helay goob lagu magacaabo Xarshow oo qiyaastii 55KM dhinaca Bariga kaxigta deegaanka Meydh, wuxuuna tilmaamay inay wadaan baritaanno.
Falaay ayaa xusay inay gacanta ku hayaan dadka lasoo badbaadiyay intooda caafimaad qabta, halka qaybtood la geeyay goobaha caafimaadka gobolkaas.
Naakhuudayaasha doonta ayaa gudoomiyaha gobolkaas sheegay inay gacanta ku hayaan iyagoo damcay inay ciidamada ka baxsadaan.
Majirto war intaas dhaafsiisan oo laga helay doontaas iyo tahriibayaasha la socday, lama oga cidda iska leh iyo halka ay kasoo shiraacata, balse warar aan la xaqiijin ayaa tibaaxaya inay kasoo kicintay dhinaca xeebta degmada Bosaso.
GAROWEONLINE
